Тукымвожшо – Марий кундемыште

 

 

Анна Щербаковалан ме путырак куаненна. Ачаж могырым кугезе кочаже Прохор Васильевич Щербаков Марий Элыште палыме да пагалыме еҥ лийын. Тудо Медведево район Туршемучаш ялеш 1914 ийыште кресаньык ешеш шочын. 1937 ийыште Марий коммунистический ялозанлык школым тунем лектын, «Рвезе коммунист» газет редакцийыште пӧлкам вуйлатен, ВЛКСМ-ын Морко районысо комитетын секретарьжылан, ВЛКСМ-ын Марий обкомжын икымше секретарьже пашам ыштен,  ВКП(б)-н Кужэҥер да Оршанке районласе комитетлаштыже кокымшо секретарь лийын. Варажым Прохор Васильевич – Оршанкысе, Пектубаевысо райисполкомын председательже. Кӱшыл партийный школ деч вара тудо Верховный Советын кум созывшын депутатше лийын, 1951-1959 ийлаште МАССР-ысе Верховный Советын президиумжым вуйлатен. Пашаште ойыртемалтмыжлан тудым Йошкар Шӱдыр да Трудовой Йошкар Знамя орден-влак дене наградитленыт. П.В.Щербаков 1971 ий 19 май марте илен. Тудым Йошкар-Оласе Туруново шӱгарлаште тойымо.

Аннан ачаже Станислав – Прохор Васильевичын Валерий эргыжын эргыже. Фигуристке А.Щербакова тӱнямбалысе таҥасымаште сеҥен да тидын дене шкаланже шочмо кечыжлан чапле пӧлекым ыштен. Ӱдыр 28 мартыште 17 ийым темен. Фигуристке-влакым саламлыме церемоний годым Российын гимнже икымше гана йоҥген огыл, тудын олмеш Пётр Чайковскийын фортепиано дене оркестрын шоктымо 1-ше №-ан концертшын ужашыже лийын.

Фотом Аннан ВКонтакте страницыж гыч налме.